Robin, än guete Start i Dini Lehr!

Liebe Robin, morn machsch Du än wiitere, grosse Schritt i Dim Läbe. Mittlerwiile häsch Du zwar scho diversi Kontochärtli und chöntsch au scho Transaktione via Online-Banking tätige. Ei Vorussetzig däfür fehlt aber no, s'Gäld. Und wie verdient mer sich das? Richtig, mer gaht go schaffe. Und genau mit däm fangsch Du morn Friitig, 14. August 2015 ah. Mir freued eus riesig und sind mächtig stolz uf Dich, dass Du morn Dini Lehr afangsch. Robin, mir wünsched Dir ganz än guete Start i Dini Lehr. Mir wünsched Dir än kompetänte Chef, netti und lässigi Arbeitskollege, än interessante Job mit viel spannende Useforderige, wiiterhin so gueti Note i dä Schuel und nöd z'letscht äs guets Händli bim Umgang mit Dim verdiente Gäld. Mir sind sehr gspannt, was Du eus in Zuekunft am Abig z'verzelle häsch und freued eus, uf Dini Bricht us dä Arbeitswält;-) Heb Dir Sorg und blieb wie bisch!